Oasis Of The Seas - الإجازة التي لا مثيل لها على كوكب الأرض
"حتى وقت كتابتي لهذا التقرير.. تعتبر (Oasis of the Seas) الأكبر والأحدث من طرازها للبواخر السياحية على مستوى العالم .. شخصيا ما طلعت عليها لكن مجرب نفس الشركة في بواخر آخرى وقريباً إن شاء الله حنخوض تجربة (Allure of the seas) .. أغلب الإنترنت بيلوك لوك على نفس الباخرة وحتى القنوات المتخصصة في السياحة.. في تقريري حأحاول أجمع كافة المعلومات إللي تفيد المواطن العربي لو حاب يطلع في الباخرة هاذي... في ناس أعرفها عمرها ما جربت تجربة السفر بالبواخر السياحية .. وحابب أوضح إنه شركة رويال كاريبيان ناس فاهمه ومحترفة سياحة و هدفها سعادة العميل من ساعة دخول للباخرة حتى بعد خروجة .. ناس رائعين جداً .... بس وكدة .. نبدأ؟"
======================
======================
في هادي الزاوية
حابب أشكر كل من يدعمني وأتمنى إني ربحت رضاكم
وكل ما أطلبه منكم
أرجوكم الدعاء لي بالصحة والعافية
=====================
=====================
======================
في هادي الزاوية
حابب أشكر كل من يدعمني وأتمنى إني ربحت رضاكم
وكل ما أطلبه منكم
أرجوكم الدعاء لي بالصحة والعافية
=====================
=====================
لولولي يعني مافي أكل المرة هادي؟ وبس مناظر؟
لا طبعا .. ما تصير السياحة سياحة بدون ما يتواجد فيها أكل و شرب. بس المرة هاذي حبيت أكتب تقرير على حاجة عندي معلومات عنها وافيه جددَي (الكبير قوي) وبحكم خلفيتي الطيبة عن الرحلات البحرية وه حيفيدني في شرح الموضوع بالكامل للسادة القراء.
طيب طيب.. كيف تبغانا نبدأ؟ حكيني عن الباخرة أول حاجة ....
طيب.. تم البدأ في مشروع الباخرة في أواخر عام 2006 تحت مسمى (Project Genesis)و تم إعلان الإسم التجاري في عام 2008 .. و قد تم الإنتهاء من بنائها في عام 2009 وكان التصنيع في مدينة توركو- فنلندا. المهم في أواخر عام 2009 بدأت الباخرة تنطلق تجاريا.. الظريف في الهرجة إنه الباخرة ما كانت وحيدة و تم بناء أختها أو بمعنى علمي (الشبيهه لها في نفس الطراز و الحجم) تحت مسمى (Allure of the seas) وكانت إنطلاقتها التجارية الرسمية في نهاية عام 2010!! يعني السنة إللي فاتت والفرق إللي بينهم بكل بساطة:
· الفرش يختلف
· Allure of the seas عملت رعاية مع شركة الكرتون (Dream Works) على أساس أنها تعمل عروض للأطفال... يعني رحلة عائلية ولا في الأحلام
· تم إضافة مطعم ستيك هاوس (25 دولار للنفر بدون المشروب)
· فتحوا ستاربكس! و فتحوا محل ل(GUESS) في (allure of the seas)
· في (Oasis of the seas) العروض الليلية هي (Hair spray show) و في (Allure of the seas) العروض الليلية هي(Chicago show).
· كمان العرض حق التزحلق على الجليد مختلف
· في (Allure of the seas) (السينما حقتوا ثري دي) !!! فلله
بس هادا هوا الفرق عموما انا أميل(Allure of the seas) بحكم إني إنسان عائلي و إبني حيفلها أكثر و ينبسط فيها أكثر من (Oasis of the seas) ... وهذا واضح في التسعيرة و سرعة الحجز بحيث أللور بحكم إنها جديدة و الفروق إللي موضحها ... تلاقي أسعارها أعلى من أوسيس (بحكم الناس قاببه عليها مو في التسعيرة) يعني صعب تلاقي حجز فيها بسعر مخفض.
بالله في فرق! ماني ملاحظ ترا
ولو جينا نقارن عائلة أوسيسز مع البواخر الأخرى إللي من نفس الشركة أو من شركات أخرى .. حتعرفوا الفرق في الحجم والضخامة
عرض الباخرة: 360 ميتر
طول الباخرة: 60 متر إجمالي - 47 متر فوق سطح البحر
عدد الطوابق: 16 دور
الباخرة تتحمل عدد ركاب: 6296 راكب كحد أقصى
عدد الموظفين في الباخرة: 2165 من 65 دولة
1200 شجرة طبيعية لتزيين منطقة (Centrel Park)
فرق 10 متر عن إرتفاع (empire statev tower)
3300 ميل أسلاك كهرباء لتشغيل أنوار الغرف !!
2300 طن موية للمسابح
630000 جالون بوية للدهان (هههههه كم معلم بوية أشتغلوا دول)
يعني من الأخر تقدر تقول مدينة متكاملة ..... وإللي معروف عن رويال كاربيان إنه المصادر الحيوية كلها تصنعها داخل الباخرة زي الصابون والشامبو و تحلية مياة المسابح و الثلج .. ومن جد حاجة مررررة ممتازة وممكن تشتريها حتى وإنت ماشي .. أذكر إني أشتريت الشامبو حقهم من الريحة الطيبة إللي كانت فيه.
الباخرة أقدر أوصفها بمنتجع جدا راقي ومتكامل من حيث مو لازم تخرج منه لأننوا في كل حاجة تبغاها:
الفندق عبارة عن 7 نجوم مو خمسة
- 24 أصنصير
- المطاعم فيه جدا راقية (المطعم إللي النزلاء يتعشوا فيه -- يا رب أحلى من قاعة ليلتي !!!) من جد والله
- منطقة التسوق متكاملة
- مسرح يتسع 3500 شخص
- أفلام سينما
- كازينوا قمار (للقمورجية والعياز بالله)
- نوادي ليلية ( إيفري دا أم شافلينج طنق طنق طنق)
- يا رب في 24 مطعم و 36 كافيه على بار!!! أم الفللله
- محل زي البقالة للكاكو و الشيبس وزي كدة
- التلفزيونات إللي بلغرف إتش دي (للمعلومية فندق هيلتون جدة إيش تلفزينهم؟؟ ياهم ليلي)
أرفقلكم شوية صور عن الباخرتين للحماس
Oasis of the Seas
Allure of the Seas
جميل جداً ... المرة هادي حبيتك ... طيب نتكلم على الفلوس .. بكم التوكر يابوو؟
إنت عارف... لو أعرف إنك حتقول توكر (نقود) حأقطع علاقتي معاك ... المهم نظام البواخر يعتمد على قد إيش حجزت قبل مدة الرحلة يعني كل ما حجزت بدري إن شاء لو سنة قبل حتوفر فلوس ... بالنسبة للبواخر إللي أصغر حيكون السعر أقل منها .. لكن بحكم إنوا (Oasis of the Seas) الأكبر حتى الأن في العالم فماسكة سعرها البعيدة وعلى فكرة تعتبر جدا جديدة ... يعتمد سعر الرحلة على:
· عدد أيام الرحلة: هناك رحلات بحرية تبدأ من 3 ليالي إلى 14 ليلة
· عدد الأشخاص: كم شخص طالع وهل بينهم أطفال أو لأ
· نوع الغرفة: هناك عدة تصانيف للغرف من حيث مساحة الغرفة و تطل على إيش؟ وهل هناك بلكونه أو شباك .. أشرحها
نوعية الغرف تحدد السعر وشي مهم جداً إنك تركز على طريقة حجز الغرف لأنه إنت تحجز الغرفة مباشرة وإنت بتحجز الرحلة يعني فين مكانها و في أية دور كمان (بحكم إني رشيق أحب تكون الغرفة بالقرب من الأصنصير .. يعني ما أخبط 30 متر عشان أروح لأصنصير... أنواغ الغرف:
- غرفة داخلية: بدون شباك و بلكونه (كئيبة وكأنك نايم في علية تونة) بس الأرخص دائما
- غرفة تطل على البرودواي: وهاذي نوعين يا شباك أو بلكون (جيدة لكن ما تطل على البحر.. إنما تطل على السوق و مكان تجمع السياح .. زي اللوبي) المفضلة لي شخصيا بحكم سعرها كويس
- غرفة تطل على البحر بشباك: طبعا تنام و تصحى على اللون الأزرق الجميل (كأنك في الكباين وبيتك يطل على البحر و طبعا حاجة ممتازة و السعر يزيد شويتيين
- غرفة تطل على البحر وببلكونه: هاذول ناس فاهمة الدنيا صح غرفة تكون كبيرة شوية وتطل على البحر وعليها بلكونه مرة تجنن وفي بعضها في وسط البلكونه في جاكوزي (ههههه لزوم الفلة أخر الليل) سعرها غالي لكن تستاهل كل دولار
· السويتات: عبارة عن غرفة كبيرة ة السعر يتحدد على نوع السويت سواء شباك أو ببلكونه لكن غرفة وفي مساحة لطاولة طعام صوغنططة و و طقم كنب أمريكي. السعر بتككلم من هنا على شخصين فوق 6000 دولار أقل حاجة
· رويال سويت: الفيديو يتحدث هههههه (المهم إللي يبغى يحجز دا يقوللي وأنا أتعرف عليه ويصير صاحبي)
طيب بالنسبة لأوسيس أو ذا سيسز أو اللور أوف ذا سيسز .. في الفترة الحالية ما تطلع إلا على رحلات أبو 7 ليالي و بصراحة جدا مناسبة المدة و ما تطفش والرحلة تبدأ من ميناء معين في ولاية فلوريدا - أمريكا ... يعني لو تبغى تطلع للباخرة دي ... لازم تسافر أمريكا ... رحلاتهم الإثنين مشككلة بس على نفس خط السير ...نتكلم بالدولار الأن:
طيب طيب لا تدف ... ممكن نعرف برنامج الرحلة كيف؟
سؤالك دليل على إنك مهتم ... شوف يا سيد الكل ... هنا يأتي مدى جمال الباخرة ... أهم حاجة وقبل ما أجاوبك ... كاميرا التصوير جدا جدا جدا مهمة ... أقدر أقسم برنامجهم إلى ثلاثة أجزاء:
انا جربت أحجز قبل ما أسافر أمريكا بشهرين على (Allure of the Seas) وكان نظام الغرفة عبارة عن غرفة بشباك تطل على البرودواي لشخصين ومعانا إبننا لمدة 7 ليالي وكان السعر عبارة عن 4200 دولار لنا كلنا ... وهذا السعر يشمل السكن مع الأكل وأعني بالأكل في كل مكان ما عدا في مطاعم قليلة تدفع مبلغ زيادة شوية وغير شامل الشرب.
والله سعر جدا جدا جدا مغري في ظل التجربة وفي خدمة أكثر من خمسة نجوم وفي أكبر باخرة في العالم!!! والله السعر طيب جدا آكل و نايم من جد ممتاز لثلاثة أشخاص مع ملاحظة الأكل جداً فخم .. مو همبرجر وأبو كلب .. لالالا من النوع الستيك الواجيو و الولينجتون و الستراجانوف وكدة يا معلم ... رفاهية وبي هذا المبلغ ... يا شيييييييخ رووووووح مش حتلاقي أقل من كدة والله لو تنط .. على فكرة انا أقدر أقارنها بفخامة ورفاهية لاس فيجاس و متعة لوس أنجلوس و لعب الديزني لاند ...
طيب طيب لا تدف ... ممكن نعرف برنامج الرحلة كيف؟
- قبل الدخول إلى الباخرة
- أثناء ما إنت في الباخرة
- أثناء تواجد في المدن السياحية
قبل الدخول إلى الباخرة
بعد عملية الحجز و دفع الفلوس... حتضطر إنك تنتظر إسبوع إلى عشرة أيام حتى يوصلك الفاوتشر حق الرحلة وإللي مبين فيه كل المعلومات المهمة و من ضمنها حاجة إسمها "دليل الرحلة" طيب إيش في هذا الدليل؟؟؟ الدليل أول حاجة بيشكرك على إنك مسافر معاهم و بعدين يعطيك بالزبط إيش الملابس إللي تحتاجها للرحلة من عدد البنطلونات وإيش نوعيتها و النظارة الشمسية و الكابات و القمصان وزي كدة .. وهذا الشي مهم بدال ما تتشنير (تتطلخبط) و تشيل حاجات أوفر وما لها داعي ... كمان حيعطيك خريطة كاملة للباخرة على أساس أول ما تدخلها لا تنفجع وتجسك صدمة حضارية .. وبعدين يتمنى لكم طيبة الإقامة معاهم.. طيب من المهم جداً إنك تحضر قبل المدة بساعتين أو أكثر ليييييش؟ عشان تتفادى زحمة التشيك إن بس من جد كل ما تروح بدري يكون أحسن.. أول ما توصل للميناء (حيجيك واحد تعطيه الفاوتشر و يستلم منك الشنط وبعد ساعتين حيوصلولك الشنط للغرفة مياشرة (هنا جدا مهم ولو حتى تزبط الراجل بكم دولار عشان ما تتأخر عليك الشنط) .. فتوصل يا باشا بدري و تنزل المسبح أو الجاكوزي ولا تتمشى في الباخرة وكدة يعني ..... الفكرة زي المطار ... كاونتر ياخد كل حاجة منك و يعطيك بطاقة حقت داخل الرحلة و ما إلى ذلك .. وهادي البطاقة جداً مهمة لأنه بيها حتحاسب داخل الباخرة لو أشتريت حاجة (زيها زي الكردت كارد المشحون) تشحن في اللوبي بالفلوس إللي تبغاها و نهاية الرحلة لو في باقي يرجعولك هوا (طبعاً أشخورلي لو باقي هللله) .. أهممممممم حاجة قبل ما تدخل الباخرة, في واحد ماسك كاميرا تصوير و جنبة لوحة مكتوب فيها (Welcome aboard) لاااااااااااااتقول ما حتتصور لأنه من جد بداية الذكريات من هادي الصورة
أثناء ما إنت في الباخرة
أول ما توصل تروح على اللوبي وحتلاقي الريسيبشن حقهم و على يسارة مكتب الرحلات البحرية أو البرامج السياحية إللي لو حابب تروحها في كل جزيرة تسافر إليها... هادول مش مهمين الأن ... تعطيه البطاقة و تشحنها و يفعللك رقم الغرفة كمان فيها و تجري على الغرفة .. حيكون في إستقبالك مدير الدور إللي إنت ساكن فيه و بعدها يرحب فيك مشرف القسم حق غرفتك و بعدين يستقبل الشخص المسؤول عن غرفتكم (الروم سيرفيس) دحين ما تتحدلق و تعطيه بخشيش اول ما تشوفه لااااا أصبرله دا أخر الرحلة مو دحين..
قبل ما الباخرة تحرك ... يجمعوا كافة الركاب مع أطواق النجاة الخاصه بكل واحد على سقف الباخرة و يعطوك إرشادات السلامة ولو لا سمح الله .. لو حصل حاجه إيش الإجراءات السريعة إللي لازم تعملها سواء إنت أو أهلك أو أطفالك و فين حيكون قارب النجاة الخاص بك كمان.... هادول ناس ما تلعب في موضوع الأمن والسلامة و جدا مهم كل ركاب الباخرة يكونوا حاضرين..
بعدها ترجع الغرفة زي العادة تفتح التلفزيون وتقول (هوا في قنوات الواحد يتفرج عليه؟ إيييييوه في هههههه ) من أهم القنوات هناك قناتين خاصة بالباخرة إللي إنت فيها .. قناة تبث كل حاجة لايف بتحصل في الباخرة و تعرض فيديوا تاريخ بناء الباخرة ... وقناة و تشرح كل حاجة تخص الجزيرة إللي إنت مسافر إليها:
- البرامج السياحية إللي تقدمها
- معلومات عامة عن الجزيرة
- كيفية التسوق في الجزيرة
- ماذا تتجنب في الجزيرة
- كيفية التعامل مع أهل الجزيرة
- رحلة عن معالم الجزيرة
- السباحة مع دولفين
- تأجير جزيرة لمدة أربعة ساعات
- تاخدلك لفه بالهوليكبتر
- رحلة دبابات
- شلالات و تجلس تتطرطش فيها
- الأحوال الجوية
- الجزيرة إللي متجهين إليها أو إن اليوم حتكون الرحلة كلها في البحر
- لبس الصباح المقترح
- لبس الليلي المقترح
- أوقات فتح وإغلاق أي نشاط
- الحاجات إللي بفلوس وإللي ببلاش
- يعني اول شي تعمله تجلس تقرأ الإرشادات اليومية
ملاحظة مهمممة: لحظة إنطلاق الباخرة لاااازم تكون فوق عند منطقة المسابح لأنه الناس إللي برا الباخرة تالقيهم بيحييوك و يودعوك و كمان إللي عندهم جي سكي أو أبوات تلاقيهم حوليك كمان و كمان شئ جدا مهم أول ما تطلع الباخرة أطلب (بينا كولادا- فريجن) مع زيادة حليب أأأأأأأه مافي زيها في العالم ... عصير طعم مرررة.
أثناء تواجدكم في الجزيرة:
كلا الباخرتين عندهم (حتى الان) برنامجيين سياحيين كل واحد فيهم مدته 7 ليالي ...
الرحلة الأولى
الرحلة الثانية
كل مدينة فيهم لها سحر ولها رونق .. يبغالي أعمل كتيب لو جلست أكتب عنها وإحنا تركيزنا على الباخرة .. المقصد من الخريطة إنك تعرف إنه في أيام الباخرة حتكون على البحر وما ترسوا على أي منطقة. نصيحتي لك تتابع القناة إللي بتذيع عن المنطقة غللي حتزورها وأنتبه لنصايحهم. الرحلات السياحية .. حلوة بس أتجنب موضوع إنك تروح أكثر من رحلة في وقت واحد لأنه حرام تصرف في حاجتين. وما حتنبصط ... وترا ممكن تجلس في الباخرة و تستمتع بمحتويات السفينة زي لعبة التسلق أو لعب الجولف أو حتى إنك تريح وتنام مثلا ....
كمان في نقطة مرررة اليمه البرنامج إللي بالسفينة أو العروض حيكون من طراز البلد إللي تروحها... مثال:
لو وصلت لهايتي .. أعمل حسابك إنه الباخرة في هذا اليوم حيكون اللبس شورتات و تي شيرت و حاجة خفيفة و الأكل من محتوى الدولة إللي رحتها ... وكدة
أخر يوم ... تصحى حتلاقي نفسك في الميناء و تعمل شيك أوت يا معلم و ترجع وحمد على السلامة و كدة
حماس والله ... ياخي طيب كيف الوضع لا خاف لا قدر الله و أحد مرض؟
شوف الفيديوا دا
الباخرة بتوفر عيادة متكاملة مع طاقم من الدكاترة و الممرضات على مدى ال 24 ساعة لضمان صحة النزلاء. يعني ما تخاف إن شاء الله تروح وترجع سالم .. صحيح بخصوص الدوخة .. انا ما حأقول إنك ما حتحس بهزة الموج .. تراك في محيط ... بس مو معناها إنك راكب سمبوك و الموج حيحدف فيك يمين و يسار هههههههههه... الناس إللي تصاب بدوار البحر .. فيه حبوب خاصة تقدر تشتريها من الصيدليات تساعدك في هذا الموقف ... خلاص أرتحت؟ كمان لازم تعرف اننوا الباخرة مجهزة إنها تعدي من أمريكا إلى أوروبا وإنت كل الجزر إللي حتروحها في ريح بعض يعني حتمشي على موازاة خليج المكسيك مو إنك حتددهر و تعدي المنش ياخي ... كمان في هيلكوبتر يتوفر لك في أقل من 20 دقيقة في أي وقت لا خاف لا سمح الله مرضك إستدعى عملية جراحية عميقة.
طيب حلو إيش عندك كمان؟
ممم والله شوف الرحلات البحرية عموما تجربة لا تنسى .. شخصيا انا خضتها فبل كدة .. وإلى اليوم حابب إني أكررها .. الرحلات البحرية عموما لها طابع الفخامة في التجهيزات بالإضافة إلى الرفاهية في الخدمة زائد الإستمتاع .. هذا الكلام كللوا ينطبق على كل الشركات البحرية .. فما بالك على شركة هدفها الأساسي يقول (Like no Vacation in Earth!) الرويال كاريبيان هدفهم من جد البحث على الحاجة النادرة وإللي صعب تلاقيها هاذي الأيام من حيث الإستمتاع و الرفاهية و الفخامة وكماااااااااااااان في باخرة!! حابب أضيف إنه الرويال كاريبيان تجلس تتحدى نفسها بالإضافة إلى الشركات المنافسة لها .. يعني في عام 1999 كانت أكبر باخرة لها في العالم .. وفي عام 1996 برضوا بنت أكبر باخرة لها بالعالم و الأن جاء دور الأختين (Oasis of the seas) و (Allure of the sea).
نقاط مهمة لازم تذكر:
- الباخرة يوجد في مصورين محترفين: مهم جدا إنك تتصور معاهم لأنها ذكرى لن تنسى (انا عندي صور من عام 2000 و 2003 ولازلت أقيمها من أفضل الصور)
- في الباخرة حتستلز بالأكل لأنه الطباخين في جداً ماهرين و محترفين أخر شي (حيكون في كتاب حق الطباخين أللييم جدا - لازم تشتريه)
- نهاية الرحلة حيكون في دي في دي خاص عن الرحلة كلها (مو لك لوحدك يا جستن بيبر) إنما لكل البشر إللي بالباخرة وهذا الدي في دي أوعدك كل ما تتفرج عليه - حتبكي من إنه ليش يا ربي خلصت بدري!! هههه من جد شعور لا يوصف و تسأل نفسك بالله انا كنت هناك! لا مو معقول
- أخر يوم في الباخرة حيعملوا حفلة في منطقة التجمع الرئيسية و حتلاقي كل أعلام العالم و الناس تلبس لبس أوطانها ... حفلة مرة حلوة .. يا سلام عليك وإنت تعطيها ذاك الشماغ بصمة 1000 و المدام عباية من دبي ... وووولد يا خليجي إنت ... بيني وبيكم انا ما عملتها .. لس من جد المرة الجاية حأطق التوب و السديري مع العممة .. وماسك في يدي جرة فول !! هههه .. المهم في هاذي الحفلة يكون نسبة التصوير مختلفة شوية وكل الناس حوليك تبغى تتصور معاك ولخخخبطة بس تحس إنه كل الناس مبسوطة
- الرويال كاريبيان .. ناس من جد محترفين .. على مدار 24 ساعة حتحس نفسك إنه هناك من يبحث عن إرضائك و سعادتك من البداية حتى النهاية
- نهاية الرحلة حيكون في برنامج في التلفزيون عن طبيعة البخشيش في الباخرة ومين يستحق تعطيه و للراكب حرية الإختيار.. المهم أخر يوم حتلاقي تحت الباب ظروف .. تحط فيها زي ما تبغى ومع الشيك أوت أعطيهم هيا.
- من جمال الرحلة حتلاقي ناس تعمل ذكرى يوم زواجها أو ناس تتزوج أو ناس تحتفل من الشفاء من المرض أو طلاق وبيحتفلوا بيه!!! من جد والله ... أو شهل عسل ... فهذا دليل إرتباط المناسبات السعيدة مع الباخرة الجميلة
- معدل الصرف الداخلي بالنسبة ليا من مشروبات و مشتريات و رحلات سياحية في الجزر و شراء من داخل الباخرة من صور و زي كدة (1500- 2500) دولار ...
أتمنى إني وفقت في كتابة التقرير
وإني قدمت قدر المستطاع
الفائدة العامة للكل
مسجل بإسم : قےهوهِہِ سےـآده
